ننشر إحدى قصائد ديوان “لو داخل قلبي” لجاسر جمال الدين

 

صدر حديثا عن الهيئة المصرية العامة للكتاب برئاسة الدكتور هيثم الحاج على، ديوان ” لو داخل قلبي”، للشاعر جاسر جمال الدين، ضمن سلسلة ديوان الشعر العامي، ويشارك الديوان بمعرض القاهرة الدولي للكتاب في دورته المقبلة.

 

وينشر موقع “المعرض”، إحدى قصائد الديوان:

لو داخل قلبي
خش يمين
هتلاقى بابين
واحد مقفول والتانى مابين
تفتح وتخش على الضلمه
كائنات بنياب بس مسالمه
تفسيرك وقتها للكلمه بتقول له أنين
هتلاقي الأرض بتشغي عينين
وتلاقي المغضوب عليهم حتى الضالين
هاتشوف شياطين

وملايكه بس بيتعاتبوا
وكلام في سياسه لكن شاطبه
وجواب كاتبه واحد مقتول
احود على طول
هتلاقي السائل والمسئول
وأميره بتغزل فوق النول بس انجرحت
اللعنه خلاص كانت سرحت
شجره وطرحت ع الأرض الموت
ترسم في سكوتك ع اللوحه لامؤاخذه تابوت
العمر يهدي لكن بيفوت
هتلاقي حاجات تم اهمالها
وهموم بتنخ بأحمالها
غلبانه ترضع في عيالها
والصدر مافيش
هتلاقي ملايه ومود طرابيش

ولفندى ينش على القهوه
والوقت يغفله على سهوه ويسحب
بشويش
الضحكه مخبيه الدمعه
والعكس صحيح
بتبان في ثوانى كما اللمعه
البنت بتغسل مش سامعه تخبيط الباب
الخوف بيلف على ضلوعها شجرة لبلاب
والعمر بيرمي على فخادها كذا كشف حساب
الصب بينزف على روحها محض أغانى
(راحوا الحبايب بقالهم عام والتانى…)
الحزن مغلف بأماني
أحلام تترص كما حكاوي
ع الأرض تبان زي رغاوي
وطنين الغساله الغاوي ينكش أوهام
هتلاقي حبيب ويا وليفه

إحساس مش ممكن توصيفه
وحنين لو أمكن تعريفه
ف هيبقى سكوت
يونس ماطلعش المرادي من بطن الحوت
الشط بيتهجى في اسمه
مستني بشوق يحضن جسمه
وتمر سنين
وتموت مقتوله بحسرتها شجرة يقطين
لو داخل قلبي خش يمين
هتلاقيCV
افتحه تلاقيه
متسيف فيه لحظات خوفك
اضغط بكليك على كشوفك
مد بشوفك ولآخر الشهر
هتلاقي مرايه وفرشة شعر