طالع قصيدة “زرعة الصبار” للشاعرة رشا الفوال

عن الهيئة المصرية العامة للكتاب برئاسة الدكتور هيثم الحاج على، صدر للشاعرة رشا الفوال ديوان عامية بعنوان ” جايز تحزن”، وهو ضمن سلسلة ” ديوان الشعر العامي”.

ويشارك الديوان بمعرض القاهرة الدولي للكتاب في دورته المقبلة.

وفيما يلي ينشر موقع ” المعرض”، إحدى قصائد الديوان بعنوان “يا زرعة الصبار”:

يا زرعة الصبار
قلبي اللى ع الشطين
ع الحرف كالنشوان للرمل بيسبل
في الصف نوره يبان، من شوقه بيهلل
ساجد، ومتشيطن
ماعرفش يتوسطن بين الخبل والعقل
ماعرفش غير تخليد اليأس في الأعصاب
وان غاب حبيبه يعود تايه أسير ذكراه
الخوف نصير الآه في الوعي والتضليل
ساجد وروحه تميل للمتعة والمعاناة
مين اللي قال الصبر يملك زمام الذات؟!
مين اللي قال الصبر بيلخبط اللذات، ويوصل التايهين

مين اللي قال الطين هيداري أوجاعنا؟
الرك ع المضامين ورحابة المعنى
قلبي اللى ع الشطين ساجد، ومتشيطن
واخد على التعديد
(أول مالوش آخر
كان الحبيب نوار
أول مالوش تاني
يازرعة الصبار)
قلبي اللي كان محروس
ساذج بنار الفرن من خوفه بيبربش
أصبح” فراش مبثوث
داير في ليل الحزن وف عشقه متكلبش
ساجد ومتشيطن

قلبي اللى عاش نزاز
هلاس: لكين معصوم
ماكرهشي غير العُمي
وسماسرة الحكايات
بيحل في الألغاز ويخالف النهايات
أعزل وليد الطمى
فاضت دموعه كتير ولا فاض حبيبه يوم
أعزل مالوش في اللوم على قسوة الأحباب
(وغياب يجر غياب
دا اللى خلا مخلاش
عود القرنفل شاب
راح الحبيب ولاجاش)