ننشر قصيدة “وبابكي” من ديوان “لسه الوجع موجود” عن هيئة الكتاب

صدر حديثا عن الهيئة المصرية العامة للكتاب برئاسة الدكتور هيثم الحاج علي، وضمن سلسلة أشعار بالعامية المصرية، ديوان “لسه الوجع موجود”، للشاعر عادل محمد قلاوة.

ومن بين قصائد الديوان، نذكر قصيدة “وبابكي”:

ما فيش بإيديا غير دمعي و كام آهة و حبة هم و حبة دم ما نشفش و باسأل ليه و حشتيني ساعات باضحك و لو باضحك على نفسي

و اقول الضحك بينسي

یا طول الرحلة والمشوار

یا سلسال الألم والنوح يا حلم وتاه يا بحر مرار يا ليل ساكن فؤادي و طاااااااال و مستني يجي له نهار

يا طير مدبوح وساكن قلبه قولة أه

و حشتيني يا رسمة حزينة في كتابي يا فرحي وحزني وعذابي يا كل الناس یا كاس علقم بيسقيني يا لحن جميل بيشجيني یا خنجر موووووت يا صافية في يوم ويوم بغيوم أنا المهموم

و حشتيني يا نص رغيف على معدة كانت فاضية

يا ضربة لقلبي كات قاضية لا انا حاسس شبع أو جوع لكن موجوع و وجعي جوة شراييني وحشتيني يا رحلة بدأتها بايدي یا نقطة دم في وريدي بتقتلني وتحييني

وحشتيني أنا الثابت على المبدأ أنا اللي بالسماح بابدأ و بابدأ عمري من عندك و عندك نار بتكويني وحشتيني

و انا ماشي ف طريق

مروي ببحر دموع

ما فيش تاني لقلبي رجوع

وحشتيني